BAKI,VOA,Yusif Şərifzadə

ABŞ-də fəaliyyət göstərən iki kiçik şirkət Prezident Donald Trampın 60 ticarət tərəfdaşından idxal olunan mallara tətbiq etdiyi yeni gömrük tariflərinin ləğvi tələbi ilə məhkəməyə müraciət edib. Şirkətlər hesab edirlər ki, bu tariflər prezidentin idxal vergilərini müəyyən etmək səlahiyyətlərini aşır.

VOA xəbər verir ki, iddia Nyu-Yorkda yerləşən ABŞ Beynəlxalq Ticarət Məhkəməsinə təqdim olunub. Məhkəmə müraciətində qeyd olunur ki, "məcburi əmək" əsaslandırması ilə tətbiq edilən yeni tariflərin hüquqi qüvvəyə malik olması üçün hər bir ölkə üzrə ayrıca və ətraflı faktiki əsaslandırma təqdim edilməlidir.

İddiaçı şirkətlər bildirirlər ki, mövcud qərar bu tələblərə cavab vermir və buna görə də tariflərin hüquqi əsası yoxdur.

Şirkətlərə əvvəlki tariflərlə bağlı məhkəmə işində uğur qazanmış qeyri-kommersiya hüquq təşkilatı hüquqi dəstək göstərir.

İddiada həmçinin vurğulanır ki, Prezident Donald Tramp daha əvvəl ABŞ Ali Məhkəməsi tərəfindən qanunsuz hesab edilən tarifləri yeni mexanizmlə yenidən tətbiq etməyə çalışır.

Məhkəmənin bu iddia ilə bağlı verəcəyi qərarın ABŞ-nin ticarət siyasəti və prezidentin tarif tətbiq etmək səlahiyyətlərinin hüdudları baxımından mühüm presedent yaratması gözlənilir.