BAKI,VOA,Yusif Şərifzadə

İran Xarici İşlər Nazirliyinin sözçüsü İsmayıl Bəqai bildirib ki, Livanın milli suverenliyi və ərazi bütövlüyü ABŞ ilə əldə olunmuş anlaşma memorandumunun əsas sütunlarından biridir.

VOA xəbər verir ki, Bəqai keçirdiyi mətbuat konfransında razılaşmanın bütün cəbhələrdə müharibənin dayandırılmasını nəzərdə tutduğunu və bu çərçivədə Livanın suverenliyinə hörmət göstərilməsinin xüsusi yer tutduğunu deyib.

Onun sözlərinə görə, Livanın milli suverenliyi və ərazi bütövlüyünün qorunması İranın beynəlxalq öhdəliklərə yanaşmasının mühüm hissəsidir.

İran rəsmisi vurğulayıb ki, əldə olunan sənəddə Livanın müstəqilliyinə və təhlükəsizliyinə hörmətlə bağlı müddəalar açıq şəkildə əks olunub.

Bəqayi qeyd edib ki, bölgədə davamlı sülh və sabitliyin əldə olunması dövlətlərin suveren hüquqlarının qorunmasından keçir.

O bildirib ki, Livanın təhlükəsizliyi və ərazi müstəqilliyi ilə bağlı hərtərəfli təminatlar olmadan heç bir razılaşma uzunmüddətli və dayanıqlı ola bilməz.

İran rəsmisinin sözlərinə görə, bu məsələ regional sabitliyin qorunması baxımından xüsusi əhəmiyyət daşıyır.

Tehran hesab edir ki, Livanın təhlükəsizliyi Yaxın Şərqdə sülhün və sabitliyin təmin olunmasının vacib şərtlərindən biridir.