BAKI,VOA,Yusif Şərifzadə
ABŞ-da Ağ Evdən Pakistanın baş nazirinin açıqlamasından sonra hələlik rəsmi mövqe bildirilməyib. Son günlər ABŞ daxilində ABŞ Prezidenti Donald Trampın dəfələrlə yaxın zamanda razılaşma olacağını deməsinə baxmayaraq, bunun reallaşmaması səbəbindən skeptik yanaşmaların artdığı qeyd olunur.
VOA xəbər verir ki, müzakirə olunan anlaşma memorandumu ilə bağlı şərtlərin hələ də tam aydın olmadığı bildirilir. İlkin mərhələdə 60 günlük atəşkəsin uzadılması, İranın Hörmüz boğazını yenidən açması və ABŞ-ın İran limanlarına tətbiq etdiyi məhdudiyyətləri yumşaltması kimi məsələlərin gündəmdə olduğu deyilir.
Məlumata görə, razılaşmanın əsas detalları hələ yekunlaşmayıb və ikinci mərhələyə saxlanılıb. Bu mərhələdə İranın nüvə proqramı, ABŞ sanksiyaları və İran aktivlərinin dondurulması kimi daha çətin məsələlərin müzakirə ediləcəyi gözlənilir.
Böyük ölçüdə qeyri-müəyyənliyin qalması səbəbindən tərəflərin yekun qərara nə zaman gələcəyi hələ də aydın deyil və proses diqqətlə izlənilir.