BAKI,VOA, Fərid Mikayılov

İran və İraq yüksək səviyyəli təhlükəsizlik rəsmiləri regional təhlükəsizlik və qarşılıqlı maraq doğuran məsələləri müzakirə ediblər.

VOA xəbər verir ki, İranın Ali Milli Təhlükəsizlik Şurası katibinin müavini Əli Baqeri Kəni ilə İraqın Milli Təhlükəsizlik müşaviri Qasım əl-Araji arasında görüş keçirilib.

Danışıqlar 14-cü Beynəlxalq Təhlükəsizlik Məsələləri üzrə Yüksək Səviyyəli Nümayəndələrin görüşü çərçivəsində baş tutub. Tərəflər əsas diqqəti sərhədlərarası təhlükələrin neytrallaşdırılması və Tehran–Bağdad strateji tərəfdaşlığının gücləndirilməsinə yönəldiblər.

İran tərəfi İraq ərazisinin Tehrana qarşı təhlükə mənbəyi kimi istifadə olunmaması üçün Bağdadın daha qətiyyətli addımlar atmasını tələb edib. Eyni zamanda regionda qeyri-sabitlik yaradan qüvvələr və xarici aktorların roluna dair fikirlər səsləndirilib.

İraq tərəfi isə İranın təhlükəsizliyinə yönəlmiş hərbi təhdidləri pisləyib və Bağdadın bu istiqamətdə əməkdaşlığa tam hazır olduğunu bildirib.

Görüşdə regional təhlükəsizlik çağırışları və ikitərəfli strateji münasibətlərin gələcək inkişaf perspektivləri ətrafında fikir mübadiləsi aparılıb.