BAKI,VOA, Fərid Mikayılov

İran Silahlı Qüvvələrinin Baş Qərargahının sözçüsü Əbulfəz Şikarçi ABŞ-yə sərt xəbərdarlıq edib.

VOA xəbər verir ki, İran mediasının yaydığı məlumata görə, Şikarçi Vaşinqtonun İrana qarşı mümkün yeni hücumlarının daha ağır və dağıdıcı nəticələr doğuracağını bildirib.

O qeyd edib ki, İran əleyhinə həyata keçiriləcək istənilən əməliyyat gözlənilməz ssenarilərlə qarşılaşacaq və ABŞ yenidən “bataqlığa saplanacaq”.

Şikarçi ABŞ-ni bölgədə gərginliyi artıracaq addımlardan çəkinməyə çağırıb.

Digər tərəfdən, Əli Əkbər Vilayəti də ABŞ Prezidenti Donald Trumpın Tehrana yönəlmiş təhdidlərinə münasibət bildirib.

Vilayəti İsrailin təsiri ilə atılan addımların ciddi nəticələr doğura biləcəyini vurğulayaraq, “İsrailin ipi ilə quyuya enməyin ağır bədəli var” ifadəsini işlədib.

O əlavə edib ki, Vaşinqton administrasiyası İran məsələsində ciddi strateji səhvlərə yol verir.

Vilayəti həmçinin bildirib ki, bölgədə baş verən son hadisələr və diplomatik gərginlik ABŞ-də qərarvermə prosesində böhranın olduğunu göstərir.