BAKI,VOA, Nailə Babazadə

İran rəhbərliyi Livanla bağlı əldə olunmuş müvəqqəti atəşkəs çərçivəsində Hörmüz boğazının bütün ticari gəmilər üçün açıq olacağını bəyan edib.

VOA xəbər verir ki,İranın rəsmi qurumları tərəfindən verilən məlumata görə, limanlar və dənizçilik təşkilatının müəyyən etdiyi koordinasiyalı marşrut üzrə bütün ticari gəmilərin keçidinə tam icazə verilib. Vurğulanıb ki, bu qərar yalnız 10 günlük atəşkəs dövrü ilə məhdudlaşır.

Hörmüz boğazının ticarət üçün açılması qlobal enerji bazarlarına dərhal təsir göstərib. Brent markalı neftin bir barelinin qiyməti bu xəbərdən sonra 8,7 faiz ucuzlaşaraq 90 dollar səviyyəsinə düşüb. ABŞ tərəfi boğazın açılmasını müsbət addım kimi qiymətləndirib və tərəflər arasında əldə olunmuş razılaşmanın regional sabitlik üçün önəmini qeyd edib.

Xatırladaq ki, Pakistanın vasitəçiliyi ilə əldə olunan və aprelin 8-dən qüvvədə olan müvəqqəti atəşkəs razılaşması Livanı da əhatə edir. Atəşkəs şərtlərinə görə, tərəflər 10 gün müddətinə hərbi əməliyyatları dayandırmalıdırlar. Lakin İsrail rəhbərliyi atəşkəsi qəbul etdiyini bildirsə də, Livanın cənubunda işğal etdiyi ərazilərdə qalmağa davam edəcəyini açıqlayıb.