BAKI,VOA, Nailə Babazadə

İranın Xarici İşlər naziri Abbas Əraqçi İsrail Baş naziri Binyamin Netanyahunun korrupsiya işi üzrə məhkəmə prosesinin yenidən başlamasına toxunaraq, regional sülhün İsrailin daxili siyasətinə təsir edəcəyini iddia edib. Nazir sosial media hesabı vasitəsilə yaydığı bəyanatda Netanyahunun məhkəmə qarşısına çıxarılmasını atəşkəs prosesi ilə əlaqələndirib.

VOA xəbər verir ki, Əraqçi bildirib ki, Livan da daxil olmaqla regionda hərtərəfli atəşkəsin təmin edilməsi Netanyahunun "həbsə girmə prosesini sürətləndirə bilər". Nazirin sözlərinə görə, müharibə vəziyyətinin sona çatması İsrail daxilindəki hüquqi proseslərin normal axarına qayıtmasına və Baş nazirə qarşı irəli sürülən ittihamların daha aktiv şəkildə araşdırılmasına yol açacaq.

İranlı nazir eyni zamanda Vaşinqtonu tənqid edərək bildirib ki, ABŞ-ın Netanyahunun diplomatiyanı məhv etməsinə göz yumması Amerikanın öz iqtisadiyyatını çöküşə aparması deməkdir: "Əgər ABŞ öz iqtisadiyyatını çöküşə sürükləmək istəyirsə, bu, onların öz seçimidir. Biz bunu axmaqlıq hesab edirik, lakin buna da hazırıq".

İsrail mediasından gələn xəbərlərə görə, İranla yaşanan müharibə səbəbindən həftələrdir fövqəladə məhdudiyyətlər altında fəaliyyət göstərən İsrail məhkəmə sistemi müvəqqəti atəşkəsdən sonra normal iş rejiminə qayıdır. Bu çərçivədə, Binyamin Netanyahunun uzun müddətdir təxirə salınan korrupsiya davası gələn bazar günü yenidən bərpa ediləcək.