BAKI,VOA

İranyönlü "Kətaib Hizbullah" qruplaşmasının lideri, ABŞ-ın Hörmüz boğazı ilə bağlı təhdidlərini reallaşdıracağı təqdirdə regiondakı bütün neft və qaz obyektlərinə hücum edəcəkləri barədə xəbərdarlıq edib.

VOA xəbər verir ki, İranın IRNA xəbər agentliyinin yaydığı məlumata görə, bu haqda qruplaşmanın rəhbəri Əbu Hüseyn əl-Həmidavi bildirib.

"Əgər onlar Hörmüz boğazını güc tətbiq edərək açmağa çalışsalar, regionda heç bir neft və qaz platforması və ya obyekti qalmayacaq."-deyə o qeyd edib.

Əl-Həmidavi ABŞ-ın regiondakı infrastrukturuna qarşı daha geniş hədələr səsləndirərək əlavə edib ki, "Tramp və tərəfdarları bilsinlər ki, onların regiondakı elektrik stansiyaları da bizim üçün qanuni hədəflərdir və bu məsələdə heç bir tərəddüdümüz yoxdur.

“Ya təhlükəsizlik hər kəs üçün bərqərar olacaq, ya da heç kim təhlükəsizlikdən bəhrələnə bilməyəcək."- deyə o bildirib.

Bu bəyanat ABŞ Prezidenti Donald Trampın İrana qarşı qoyduğu çərşənbə axşamı ultimatuumuna cavab olaraq gəlib. "Kətaib Hizbullah"ın bu təhdidi göstərir ki, münaqişə alovlanacağı təqdirdə İranın proksi qüvvələri təkcə hərbi bazaları deyil, həm də bütün Yaxın Şərqin iqtisadi infrastrukturunu hədəf almağı planlaşdırır. Bu, xüsusilə Körfəz ölkələrinin enerji ixracı və enerji təminatı üçün ciddi ekzistensial təhlükə yaradır.