BAKI,VOA, Nailə Babazadə

İran İslam Şurası Məclisinin sədri Məhəmməd Baqir Qalibaf ABŞ-ın bölgədəki hərbi hərəkətliliyini və qoşun yerləşdirmə planlarını yaxından izlədiklərini bəyan edib. O, Vaşinqton administrasiyasına müraciət edərək, "Torpaqlarımızı müdafiə etmək qətiyyətimizi sınamayın" ifadəsini işlədib.

VOA xəbər verir ki, Qalibaf "X" sosial media platformasında paylaşdığı mesajında Pentaqonun bölgəyə əlavə qüvvələr göndərəcəyi ilə bağlı yayılan xəbərlərə münasibət bildirib. Məclis sədri qeyd edib ki, generalların və siyasi qərar vericilərin yol verdiyi səhvləri əsgərlər düzəldə bilməz. O, həmçinin ABŞ hərbçilərinin İsrailin Baş naziri Benyamin Netanyahunun xülyalarının qurbanı olacağını vurğulayıb.

Xatırladaq ki, ABŞ mediasında Müdafiə Nazirliyinin (Pentaqon) ordunun 82-ci Hava-Desant Diviziyasından təxminən 3 min hərbçini İranla mümkün müharibə riski səbəbindən Yaxın Şərqə göndərməyə hazırlaşdığı barədə iddialar yer almışdı.

Məsələyə İranın ali rəhbəri Ayətullah Müctəba Xameneyinin Müdafiə Şurasındakı nümayəndəsi Əli Əkbər Əhmədyan da kəskin reaksiya verib. O, "İllərdir amerikalıların bura gəlməsini gözləyirik. ABŞ əsgərlərinə tək bir mesajımız var: Yaxınlaşın" deyərək Tehranın geri addım atmayacağını bildirib.