BAKI,VOA, Fərid Mikayılov

Amerika Birləşmiş Ştatlarının vitse-prezidenti Cey Di Vens rəsmi Vaşinqton ilə Tel-Əvivin regional siyasətdə hər zaman eyni mövqedən çıxış etmədiyini etiraf edib.

VOA xəbər verir ki, vitse-prezident İran məsələsində ABŞ və İsrailin strateji maraqlarının ayrışa biləcəyini və bu prosesdə Ağ Evin yalnız öz milli menafelərini güdəcəyini bəyan edib.

Vens, ABŞ və İsrailin bir çox sahədə "ortaq maraqlara" sahib olduğunu bildirsə də, gərginliyin artdığı Tehran xəttində ciddi fikir ayrılıqlarına diqqət çəkib.

"Çıxarlarımızın ayrışdığı bəzi vəziyyətlər var. Prezident Donald Trampın ən qətiyyətli olduğu məqam budur: İsrailin öz fərqli hədəfləri ola bilər, lakin ABŞ-ın İrandakı fundamental məqsədi yalnız bu ölkənin nüvə silahı əldə etməsinin qarşısını almaqdır"- deyə o bildirib.

Vitse-prezident son bir yarım il ərzində Tehran ilə nüvə proqramına dair uzunmüddətli sazişin imzalanması üçün əlverişli şəraitin formalaşdığını iddia edib. O, Vaşinqtonun diplomatik masaya sadiqliyini vurğulayaraq bildirib: "İsrail bundan məmnun ola da bilər, olmaya da bilər, lakin biz bu razılaşmanın tamamilə ABŞ-ın menafelərinə uyğun olduğunu düşünürük."