BAKI,VOA Yusif Şərifzadə

İran İslam İnqilabı Keşikçiləri Korpusu ölkə ərazisində İsraillə əlaqəli olduğu iddia edilən silah qaçaqmalçılığı şəbəkələrinə qarşı geniş əməliyyat keçirildiyini açıqlayıb.

VOA xəbər verir ki, SEPAH-ın kəşfiyyat qurumu tərəfindən yayılan bəyanatda məqsədyönlü əməliyyat və kəşfiyyat tədbirləri nəticəsində 20 nəfərdən ibarət beş mütəşəkkil təhlükəsizlik pozucu şəbəkənin müəyyən edilərək zərərsizləşdirildiyi bildirilib.

İran dövlət televiziyası IRIB-in yaydığı məlumata əsasən, əməliyyat çərçivəsində qanunsuz silah və sursat daşımalarının marşrutları izlənilib, terror qrupları və silah qaçaqmalçıları ilə əlaqədə olduğu iddia edilən şəxslər saxlanılıb.

Rəsmi məlumata görə, əməliyyat zamanı 50-dən çox odlu silah, 70 kiloqram partlayıcı maddə, 2 min ədəd güllə və müxtəlif növ sursat aşkar edilərək müsadirə olunub.

İran rəsmiləri hadisənin ölkənin milli təhlükəsizliyinə qarşı yönəlmiş fəaliyyətlərin qarşısının alınması məqsədi daşıdığını vurğulayıb. Hadisə regionda İran-İsrail qarşıdurmasının fonunda təhlükəsizlik gərginliyinin artdığı bir dövrdə baş verib.