BAKI,VOA, Fərid Mikayılov

Türkiyənin daxili işlər naziri Mustafa Çiftçi rəsmi təmaslar çərçivəsində bu gün Suriyaya səfər edəcək.

VOA xəbər verir ki, səfər zamanı təbii fəlakətlərin idarə olunması, təhlükəsizlik, hüquq-mühafizə orqanlarının əməkdaşlarının hazırlanması və suriyalıların könüllü geri dönüşü məsələləri müzakirə olunacaq.

Nazirin Suriyanın daxili işlər naziri Ənəs Həttab və fövqəladə hallar və fəlakətlərin idarə olunması naziri Raid əs-Salih ilə görüşəcəyi gözlənilir. Tərəflərin iki ölkə arasında "Fövqəladə hallar və fəlakətlərin idarə olunması sahəsində əməkdaşlıq haqqında Anlaşma Memorandumu" imzalayacağı bildirilir.

Danışıqların əsas mövzularından biri təhlükəsizlik sahəsində əməkdaşlıq olacaq. Görüşlərdə terror təşkilatlarına qarşı mübarizədə qətiyyət mesajının veriləcəyi, qaçaqmalçılıq, mütəşəkkil cinayətkarlıq, narkotik vasitələrin qanunsuz dövriyyəsinə qarşı mübarizə və sərhəd təhlükəsizliyi sahələrində təcrübə mübadiləsinin aparılacağı qeyd olunur.

Bununla yanaşı, Suriyalı polis əməkdaşlarının öz ölkələrində hazırlanması üçün zəruri infrastrukturun yaradılması və bu sahədə əməkdaşlığın genişləndirilməsi də müzakirə ediləcək.

Səfər çərçivəsində Mustafa Çiftçinin Suriya Prezidenti Əhməd əş-Şəra ilə də görüş keçirməsi planlaşdırılır.