BAKI,VOA Orxan Qədirzadə
Türkiyənin paytaxtı Ankarada İŞİD terror təşkilatına qarşı keçirilən xüsusi əməliyyat zamanı silahlı qarşıdurma baş verib. Təhlükəsizlik qüvvələrinin keçirdiyi əməliyyat nəticəsində bir terrorçu zərərsizləşdirilib, digər şübhəli isə yaralı vəziyyətdə saxlanılıb.
Məlumata görə, əməliyyatdan əvvəl uzun müddət kəşfiyyat və müşahidə tədbirləri həyata keçirilib. Əldə olunan məlumatlar əsasında Ankara vilayətinin Haymana rayonunun Sazağası məhəlləsində yerləşən ünvanda İŞİD üzvlərinin gizləndiyi müəyyən edilib.
Bunun ardından Polis Xüsusi Hərəkat İdarəsinin əməkdaşları tərəfindən səhər saatlarında həmin ünvana xüsusi əməliyyat təşkil olunub.
Əməliyyat zamanı təhlükəsizlik qüvvələri evdə olan şəxslərə təslim olmaları barədə çağırış edib. Lakin evdə gizlənən şəxslər polis əməkdaşlarına atəş açaraq müqavimət göstəriblər. Bundan sonra tərəflər arasında silahlı qarşıdurma başlayıb.
Xüsusi təyinatlı polis qüvvələrinin həyata keçirdiyi əməliyyat nəticəsində şübhəlilərin qaçış yolları bağlanıb və yaşayış evi tam mühasirəyə alınıb.
Baş verən qarşıdurma zamanı terror təşkilatının üzvü olduğu bildirilən Məhəmməd K. zərərsizləşdirilib. Onun həyat yoldaşı N.K. isə yaralı vəziyyətdə saxlanılıb.
Yaralanan qadına hadisə yerində ilkin tibbi yardım göstərildikdən sonra ciddi təhlükəsizlik tədbirləri altında xəstəxanaya aparılıb və nəzarətə götürülüb.
Əməliyyatdan sonra təhlükəsizlik qüvvələri yaşayış evinə tam nəzarəti ələ keçirərək ərazidə araşdırmaları davam etdiriblər.
İstintaq zamanı zərərsizləşdirilən şəxsin Türkiyədə terror aktları həyata keçirmək üçün göstərişlər verən İŞİD rəhbərlərindən biri ilə sosial şəbəkə üzərindən əlaqə saxladığı müəyyən edilib.
Araşdırmalar nəticəsində onun iki fərqli sosial media hesabından istifadə etdiyi aşkarlanıb. Məlumata görə, həmin hesablardan biri vasitəsilə terror təşkilatına bağlı qapalı müzakirə qruplarında iştirak edib.
Digər gizli hesab üzərindən isə təşkilat rəhbərliyi ilə əlaqə saxladığı müəyyənləşdirilib.
Hadisə ilə bağlı istintaq və əməliyyat-axtarış tədbirləri davam etdirilir. Təhlükəsizlik orqanları terror təşkilatının ölkə daxilindəki mümkün əlaqələrinin və digər üzvlərinin müəyyənləşdirilməsi istiqamətində araşdırmaları genişləndirib.
