BAKI,VOA, Fərid Mikayılov

Türkiyə Milli Kəşfiyyat Təşkilatı (MİT) terror təşkilatı İŞİD-ə qarşı növbəti strateji və sarsıdıcı zərbəni vurub.

VOA xəbər verir ki, keçirilən uğurlu xüsusi əməliyyat nəticəsində İŞİD-in sözdə "Xorasan Vilayəti" (ISKP) media qanadının mühüm fiquru, təşkilatın sözdə Türkiyə media məsulu, "Abu Ubeyde / Abu İbrahim" kod adlı Əhməd Qazançı sərhəd bölgəsində yaxalanaraq Türkiyəyə gətirilib.

Təhlükəsizlik mənbələrindən əldə edilən məlumatlara görə, MİT Əhməd Qazançının Türkiyədən qeyri-qanuni yollarla Əfqanıstan-Pakistan bölgəsinə keçdiyini, orada İŞİD-in "Xorasan Vilayəti" qanadına qoşularaq terror düşərgələrində aktiv fəaliyyət göstərdiyini müəyyən edib.

Uzunmüddətli kəşfiyyat izləmələri nəticəsində o da bəlli olub ki, Qazançı daha öncə Pakistanda yaxalanaraq Türkiyəyə gətirilən İŞİD-in əvvəlki sözdə Türk media rəhbəri "Abu Yasir Al Turki" kod adlı Özgür Altun ilə sıx əlaqədə işləyib. Özgür Altun həbs edildikdən sonra onun təşkilat daxilindəki bütün media və təbliğat öhdəliklərini Əhməd Qazançı təhvil alıb və qruplaşmanın yeni Türkiyə media rəhbəri təyin edilib.

MİT tərəfindən addım-addım təqib olunan terrorçunun Pakistanda İŞİD mövqelərinə təşkil edilən hava zərbələrindən sağ qurtulduğu öyrənilib. Bölgədəki hərbi və ideoloji təlimlərini tamamlayan Qazançının gizli yollarla yenidən Türkiyəyə sızmaq, burada yeni terror hüceyrələri qurmaq və təşkilata yeni üzvlər qazandırmaq niyyətində olduğu öyrənilib. Bu planı vaxtında ifşa edən MİT rəsmiləri əməliyyat üçün düyməyə basıb və Əhməd Qazançını sərhəd xəttində reallaşdırılan əməliyyat ilə zərərsizləşdirilib.