BAKI,VOA

Türkiyə Milli Kəşfiyyat Təşkilatı (MİT) Suriyada İŞİD terror təşkilatına qarşı sərhəddən kənar əməliyyat həyata keçirib.

VOA xəbər verir ki, MİT-in Suriya kəşfiyyat xidməti ilə koordinasiyalı şəkildə keçirdiyi əməliyyat nəticəsində qırmızı bülletenlə axtarılan 10 İŞİD üzvü saxlanılaraq Türkiyəyə gətirilib.

İstintaq məlumatlarına əsasən, saxlanılan şəxslərin Türkiyədən Suriyaya keçərək terror təşkilatına qoşulduqları və müxtəlif fəaliyyətlərdə iştirak etdikləri müəyyən olunub. Həmçinin onların Türkiyədə baş vermiş bir sıra terror hadisələri ilə əlaqələrinin olduğu bildirilib.

Əməliyyat zamanı saxlanılan şəxslərdən birinin 2015-ci ildə 109 nəfərin həyatını itirdiyi Ankara vağzalı terror aktının icraçıları ilə əlaqəsinin olduğu qeyd olunub.

Bildirilib ki, kəşfiyyat məlumatlarının əldə olunmasından sonra MİT və Suriya tərəfi birgə fəaliyyətə başlayıb, şübhəlilərin hərəkətləri izlənilib və yerləşdikləri ərazilər müəyyənləşdirilib.

Əməliyyatdan sonra saxlanılan şəxslərdən 9-u məhkəmə qərarı ilə həbs olunub, bir nəfərlə bağlı araşdırmalar isə davam etdirilir. İstintaq çərçivəsində onların təşkilat daxilində fəaliyyətləri, aldıqları təlimlər və terror təşkilatının təbliğat fəaliyyətləri ilə bağlı məlumat verdikləri bildirilib.