BAKI,VOA, Orxan Qədirzadə

Türkiyənin texnologiya nəhəngi "Baykar" şirkəti tərəfindən milli imkanlarla hazırlanan "Mızrak" ağıllı sursat sistemi ilk dəfə "SAHA 2026" sərgisində nümayiş etdiriləcək.

Bu barədə VOA-ya Baykar şirkətinin ictimaiyətlə əlaqələr şöbəsindən məlumat verilib.

Bildirilib ki, 1000 kilometrdən çox mənzilə və süni intellekt dəstəyinə malik olan bu platforma, müasir döyüş meydanında oyunun qaydalarını dəyişən yeni güc faktoru olacaq.

Yüksək vuruş gücü və texniki göstəricilər

Adını aerodinamik quruluşundan alan "Mızrak", iki fərqli konfiqurasiyada təqdim olunur. 40 kq-lıq cüt döyüş başlığı ilə yüksək dağıdıcı güc təmin edən sistem, eyni zamanda 20 kq-lıq tək başlıqlı və RF (Radio Tezlik) axtarış başlığı ilə təchiz edilmiş versiyada hədəfi yüksək dəqiqliklə müəyyən edə bilir. 7 saatdan çox havada qala bilən sursat, 10.000 fut yüksəklikdə və 185 km/saat sürətlə tapşırıq icra etmək qabiliyyətinə malikdir.

GPS-dən asılı olmayan süni intellekt texnologiyası

"Mızrak"ın ən diqqətçəkən xüsusiyyətlərindən biri elektron müharibə şəraitində belə fəaliyyət göstərməsidir. Süni intellekt dəstəkli avtopilot və optik hədəfləmə sistemi sayəsində platforma, GPS siqnalının kəsildiyi və ya qarışdırıldığı bölgələrdə belə hədəfini itirmir. Sensor füzyonu və vizual mövqeləndirmə bacarığı sursatın tam avtonom hərəkətini təmin edir.

Hər şəraitdə start və şəbəkə mərkəzli müharibə

Əməliyyat çevikliyi ilə seçilən "Mızrak", həm standart uçuş-enmə zolağından, həm də raket dəstəkli start (RATO) sistemi ilə çətin ərazi şəraitindən havaya qalxa bilir. Sistem "Bayraktar TB2", "TB3" və "AKINCI" kimi PUA-larla fasiləsiz xəbərləşmə şəbəkəsinə daxildir ki, bu da onu döyüş meydanında koordinasiyalı bir qüvvəyə çevirir.