BAKI,VOA Orxan Qədirzadə
Türkiyədə Cumhuriyyətin ilk illərinə aid 1933-cü il tarixli arxiv sənədi üzə çıxıb. Sənəd Danimarkanın Erzurum və Kars bölgələrində süd sənayesinin yaradılması imkanlarını araşdırdığını göstərir.
Türkiyə Dil və Ədəbiyyat Dərnəyinin Erzurum şöbəsinin idarə heyətinin üzvü Taner Özdemirin aşkarladığı sənədə əsasən, Danimarka Krallığının səfirliyi 4 dekabr 1933-cü ildə Türkiyənin Xarici İşlər Nazirliyinə nota göndərib.
Notada Alfred Thorvald Larsen və Peter Weigel adlı iki şəxsin Erzurum və Kars bölgəsinə gedərək süd sənayesinin qurulması üçün mövcud şəraiti yerində araşdırmasına icazə verilməsi xahiş olunub.
Türkiyə tərəfi isə bu araşdırmaya rəsmi razılıq verərək yerli hakimiyyət orqanlarına lazımi göstərişlərin göndərildiyini bildirib.
Sənəd həmin dövrdə Erzurum və Karsın yalnız heyvandarlıq bölgəsi deyil, müasir süd sənayesinin inkişaf etdirilə biləcəyi iqtisadi məkan kimi də qiymətləndirildiyini ortaya qoyur. Danimarkanın bu istiqamətdəki marağı isə bölgənin potensialının həmin dövrdə xaricdən də diqqət çəkdiyini göstərir.