BAKI,VOA, Fərid Mikayılov
İstanbulnin Pendik rayonunda boş ərazidə torpaq altındakı su quyusunda gizlədilmiş minlərlə silah hissəsi aşkar olunub.
VOA xəbər verir ki, əməliyyat nəticəsində 4 şübhəli saxlanılıb.
İstanbul Polis İdarəsinin Mütəşəkkil Cinayətkarlıqla Mübarizə Şöbəsi tərəfindən həyata keçirilən tədbir zamanı əvvəlcədən daxil olan məlumat əsasında ərazi nəzarətə götürülüb. Polis əməkdaşları dron vasitəsilə apardıqları müşahidə zamanı torpaq altına daxil olub-çıxan şəxsləri müəyyən ediblər.
Aparılan araşdırmalar nəticəsində yeraltı su anbarı aşkar edilib. Daha sonra keçirilən əməliyyat zamanı həmin anbarda gizlədilmiş 3 min 92 ədəd silah hissəsi, o cümlədən 1869 sürgü və digər müxtəlif detallar ələ keçirilib.
Bildirilib ki, bu, Türkiyə üzrə bir əməliyyatda aşkarlanan ən böyük silah hissəsi partiyalarından biridir.
Saxlanılan 4 nəfər istintaqa cəlb olunub, faktla bağlı araşdırmalar davam etdirilir.