BAKI, VOA, Nailə Babazadə

Türkiyənin nəqliyyat və infrastruktur naziri Abdulkadir Uraloğlu AK Partiyanın TBMM-dəki qrup toplantısından əvvəl jurnalistlərin suallarını cavablandırarkən Hörmüz boğazında qalan türk mülkiyyətindəki gəmilərin son vəziyyəti barədə məlumat verib.

VOA xəbər verir ki, nazir bildirib ki, hazırda boğazda Türkiyəyə məxsus 14 gəmi var və Xarici İşlər Nazirliyi ilə koordinasiyalı şəkildə onların ərazidən çıxarılması üçün işlər davam etdirilir. Uraloğlu vurğulayıb ki, hazırda gəmilərin çıxarılması üçün əlverişli imkan yaranmasa da, heyət üzvləri və kapitanlarla davamlı ünsiyyət saxlanılır.

Nazir qeyd edib ki, boğazdakı 3 gəminin çıxmaq barədə müraciəti yoxdur, çünki onlar enerji istehsalı və digər xüsusi əməliyyatlar üçün orada fəaliyyət göstərirlər. Digər gəmilərin çıxarılması ilə bağlı diplomatik görüşlərin davam etdiyini deyən Uraloğlu əlavə edib: "Heyətlə daim əlaqədəyik. Hər hansı humanitar problemləri yoxdur, vəziyyəti yaxından izləyirik". Hörmüz boğazındakı gərginliyə baxmayaraq, türk dənizçilərinin təhlükəsizliyinin təmin edilməsi rəsmi Ankaranın əsas prioritetlərindən biri olaraq qalır.

Jurnalistlərin "Altura" adlı tankerin İstanbul boğazından təxminən 14 mil məsafədə pilotsuz dəniz aparatı tərəfindən hücuma məruz qalması barədə sualını cavablandıran nazir, mütəxəssislərin hadisəni araşdırdığını bildirib. O, gəmidəki partlayışın kənar müdaxilə nəticəsində baş verdiyini təsdiqləsə də, bunun konkret olaraq hansı növ silahla törədildiyinin dəqiqləşdirildiyini qeyd edib. Uraloğlu hadisənin Türkiyənin ərazi sularından kənarda baş verdiyini və hazırda Qara dənizdə naviqasiya təhlükəsizliyi ilə bağlı ümumi bir problemin olmadığını diqqətə çatdırıb.