BAKI, AzerVoice, Fərid Mikayılov

Türkiyə Prezidenti Rəcəb Tayyib Ərdoğan son illərdə Türkiyə-Misir münasibətlərində əldə olunan irəliləyişin tarixi səviyyəyə yüksəldiyini bildirib.

AzerVoice xəbər verir ki, Ərdoğan, Türk və Misir Hərbi Dəniz Qüvvələrinin 13 ildən sonra birgə keçirdiyi “Dostluq Dənizi Təlimi”nin əhəmiyyətini vurğulayaraq, bu addımın Türkiyənin regional sülh və təhlükəsizlikdə oynadığı rolun bariz nümunəsi olduğunu qeyd edib.

O, həmçinin Türkiyənin vasitəçiliyi ilə Liviyada əldə edilən sülhün bölgə üçün də ümid işığı olduğunu xatırladıb.

“Türkiyənin heç kimin ərazisinə və haqqına göz dikmək niyyəti yoxdur. Ancaq milli maraqlarımızı qorumaqda da qətiyyətliyik. Aralıq dənizindəki enerji resursları ilə bağlı mövqeyimiz aydındır. Payımıza düşəni alır və qazan-qazan prinsipi əsasında qonşularımızla əməkdaşlıq edirik. Türkiyənin bu qətiyyətli mövqeyi bölgədə balansların yenidən qurulmasına səbəb olub”- deyə Türkiyə lideri bildirib.

Ərdoğan çıxışında Kipr probleminə də diqqət çəkərək federasiya modelinin artıq gündəmdən çıxdığını vurğulayıb.

“Kipr türkü adada azlıq olmağı əsla qəbul etməyəcək. Yeganə realist həll yolu adada iki ayrı dövlətin varlığının tanınmasıdır. Biz bu mövqeyimizi BMT Baş Assambleyasında açıq şəkildə elan etdik. Bu mövqeyin dəyişəcəyini gözləmək doğru deyil”- deyə Ərdoğan qeyd edib.

Ərdoğan əlavə edib ki, qarşıdan gələn Şimali Kipr Türk Cümhuriyyəti seçkilərinin də bölgədə sabitlik və ədalətli həll prosesinə töhfə verəcəyinə inanır.