BAKI, AzerVoice
Türkiyənin beşinci nəsil milli döyüş təyyarəsi KAAN layihəsi çərçivəsində ilk uçan prototipin 2026-ci ilin aprel ayında səmaya qalxacağı gözlənilir. Bu barədə Türk Havacılıq və Kosmos Sənayesi (TUSAŞ) baş direktoru Mehmet Demiroğlu məlumat verib.
AzerVoice xəbər verir ki, Demiroğlu bildirib ki,2026- ci ilin aprel ayında ilk prototipin, üç ay sonra isə ikinci prototipin uçuşu planlaşdırılır. Hazırda üç uçuş prototipi və bir statik təyyarə üzərində işlər davam etdirilir. Növbəti mərhələdə əlavə üç prototipin də hazırlanması nəzərdə tutulur.
“KAAN təkcə bizim deyil, ölkəmizin də qürur mənbəyidir. Bu, dünyada cəmi dörd ölkənin bacardığı bir sinifdir – beşinci nəsil döyüş təyyarəsi. Layihəyə tam sürətlə davam edirik. İnşallah, 2028–2029-cu illər aralığında Türk Hava Qüvvələrinə ilk təyyarələrin təhvili başlayacaq,” – deyə TUSAŞ rəhbəri qeyd edib.
Hazırda KAAN təyyarəsi üzərində müxtəlif yer testləri və simulyasiya sınaqları aparılır. 2026-cı ilin sonuna qədər üç prototipin tam uçuş qabiliyyətinə çatacağı planlaşdırılır. TUSAŞ rəsmisi ilk təhvil prosesinin 2028-ci ilin sonu – 2029-cu ilin əvvəlinə planlaşdırıldığını bildirib.
Qeyd edək ki, TUSAŞ tərəfindən istehsal edilən 5-ci nəsil döyüş təyyarəsi KAAN ilk uçuşunu 21 fevral 2024-də həyata keçirib. Təyyarə, 3 dəqiqə havada qalaraq 8 min fut hündürlüyə qalxıb.
Haluk Görgün daha əvvəl KAAN-ın 2028-ci ildə envanterə daxil olacağını açıqlayıb. 2034-cü ilə qədər təxminən 500 KAAN, HÜRJET və HÜRKUŞ təyyarəsinin istehsal ediləcəyini bildirib.