BAKI, AzerVoice

Türkiyə və Oman enerji sahəsində əməkdaşlığı gücləndirmək üçün yeni razılaşma əldə ediblər.

AzerVoice xəbər verir ki, bu barədə Türkiyənin Enerji və Təbii Sərvətlər naziri Alparslan Bayraktar X sosial media hesabında məlumat paylaşıb.

Muskatda keçirilən görüşdə Bayraktar və Omanın Enerji və Mədənlər naziri Salim Nasser Al Aufi arasında enerji sahəsində potensial əməkdaşlıqlar müzakirə olunub və müvafiq anlaşma memorandumu imzalanıb.

Bayraktar bildirib ki, əldə olunan razılaşma neft və təbii qazın kəşfi, daşınması və emalından tutmuş, elektrik enerjisi, bərpa olunan enerji, enerji səmərəliliyi və hidrogen texnologiyaları sahələrində texniki bilik və təcrübə mübadiləsi, habelə birgə layihələrin həyata keçirilməsini nəzərdə tutur.

“Mövcud əməkdaşlığımızı daha da irəli aparacaq bu sazişin yaxın dövrdə konkret layihələr və ortaq qazanc imkanları ilə dərinləşəcəyinə inanırıq” – deyə nazir əlavə edib.

Səfər çərçivəsində Türkiyə Neft Şirkəti (TPAO), Omanın Enerji və Mədənlər Nazirliyi (MEM) və “OQ Exploration and Production New Ventures L.L.C.” (OQEP) ilə üçtərəfli anlaşma sənədi imzalanıb.

Razılaşmaya əsasən, TPAO-ya müəyyən sahələrdə qiymətləndirmə və araşdırma aparmaq üçün 3 aylıq eksklüziv hüquq verilib. Eyni zamanda TPAO və OQEP arasında yeni imkanların birgə qiymətləndirilməsinə dair əlavə əməkdaşlıq sazişi də imzalanıb.

Enerji naziri Bayraktar əlavə edib ki, səfər zamanı Oman İnvestisiya İdarəsinin rəhbəri Abdulsalam bin Məhəmməd Al Murşidi ilə də görüş keçirilib. Görüşdə neft və qaz, bərpa olunan enerji və elektrik infrastrukturu da daxil olmaqla müxtəlif sahələrdə qarşılıqlı investisiya imkanları müzakirə olunub.