BAKI, AzerVoice

Dünya sülhü üçün həqiqət və ədalət əsaslı media anlayışı önəmlidir.

AzerVoice xəbər verir ki, Türkiyə Prezident Administrasiyasının Kommunikasiya Direktoru Fahrettin Altun “Türkiyə-Çin Media Forumu” çərçivəsində çıxış edərək, qlobal miqyasda həqiqət və ədalət mərkəzli yanaşmanın zəruriliyinə diqqət çəkib.

O, Prezident Rəcəb Tayyib Ərdoğanın “Daha ədalətli dünya” çağırışını hər platformada uca səslə dilə gətirdiyini vurğulayıb.

Altun bildirib ki, dünyada artan qeyri-müəyyənliklər və münaqişələr fonunda Türkiyə sabitləşdirici güc kimi “hamı üçün sülh və firavanlıq” uğrunda çalışır. O, Türkiyənin Çinlə əlaqələrinin mədəni və tarixi bağlar üzərində qurulduğunu və medianın bu əlaqələrin möhkəmlənməsində önəmli rol oynadığını qeyd edib.

Çıxışında Altun medianın yalnız məlumat ötürən deyil, həm də mənanı formalaşdıran bir güc olduğunu vurğulayıb. “Dezinformasiya, qütbləşmə və süni məzmun manipulyasiyası qlobal bir problemdir. Bu səbəbdən biz, beynəlxalq media həmrəyliyi və doğru informasiya paylaşımı üçün əməkdaşlığı gücləndirməliyik.”- deyə o qeyd edib.

Altun, rəqəmsal diplomatiya və strateji kommunikasiya sahəsində atılan addımların, xüsusilə Çinlə qarşılıqlı təcrübə və məlumat mübadiləsinin, bu istiqamətdə önəmli töhfələr verdiyini qeyd edib. O əlavə edib ki, iki ölkə arasında media sahəsindəki əməkdaşlıq təkcə informasiya deyil, sülh və mədəni yaxınlaşma baxımından da strateji əhəmiyyət daşıyır.

“Biz birlikdə, insan ləyaqətinə əsaslanan, həqiqəti önə çıxaran və dezinformasiyaya qarşı dayanıqlı media ekosistemi qurmaq üçün çalışmağa davam edəcəyik.” - deyə Altun çıxışını belə yekunlaşdırıb.