BAKI,VOA,Yusif Şərifzadə

ABŞ Prezidenti Donald Trampın sahibi olduğu sosial media şirkətinin Truth Social platformasında yayımlanan paylaşımlara daha sürətli çıxış üçün aylıq 100 min ABŞ dollarına qədər ödəniş tələb edə biləcəyi bildirilir.

VOA xəbər verir ki, bu barədə Financial Times nəşri məlumat yayıb. Məlumata əsasən, Trampın sosial media şirkəti banklar, investisiya şirkətləri və maliyyə bazarının digər iştirakçıları üçün prezidentin paylaşımlarını hamıdan daha tez əldə etməyə imkan verən yeni xidmət üzərində işləyir. Məlumat hələlik müstəqil şəkildə təsdiqlənməyib.

Bildirilir ki, şirkət "Truth API" adlandırılan ödənişli məlumat xidmətini təqdim edib. Bu xidmət maliyyə qurumlarına və ticarət şirkətlərinə platformadakı ən nüfuzlu hesabların paylaşımlarını adi bildirişlərdən daha sürətli əldə etmək imkanı verəcək.

Şirkət nümayəndəsinin sözlərinə görə, sistem ilk mərhələdə platformanın ən çox izlənilən 10 hesabının paylaşımlarını istifadəçilərə mümkün olan ən qısa müddətdə çatdıracaq.

Bu xidmət Tramp Media və Texnologiya Qrupunun məlumatların lisenziyalaşdırılması sahəsinə ilk addımı hesab olunur. Şirkət bununla yeni gəlir mənbəyi formalaşdırmağı hədəfləyir.

Son dövrlərdə iri sosial media platformaları ilə rəqabətdə çətinliklərlə üzləşən şirkətin yeni təşəbbüsü maliyyə bazarlarında məlumat üstünlüyü əldə etmək istəyən investorların diqqətini cəlb edir.