BAKI, AzerVoice

ABŞ-ın Prezidenti Donald Tramp və Türkiyə Prezidenti Rəcəb Tayyib Ərdoğan bu həftə İstanbulda ABŞ və İran nümayəndələri arasında gizli diplomatik görüş təşkil etmək üçün bir-biri ilə əlaqə saxlayıb.

AzerVoice xəbər verir ki, bu barədə Axios portalı mənbələrə istinadən məlumat yayıb.

Məlumata görə, Ərdoğan ötən həftə keçirilən G7 sammiti zamanı Trampla telefon əlaqəsi saxlayaraq, ertəsi gün İstanbulda tərəflər arasında bir görüş təşkil olunmasını təklif edib. Tramp bu təklifə müsbət yanaşaraq, əgər razılaşma şansı yaranarsa, vitse-prezident Cey Di Vensi və ABŞ-ın Yaxın Şərq üzrə xüsusi nümayəndəsi Stiven Uitkoffu Türkiyəyə göndərə biləcəyini bildirib. O hətta özü də İran Prezidenti Məsud Pezeşkiyan ilə birbaşa görüşməyə hazır olduğunu qeyd edib.

Prezident Ərdoğan və Türkiyənin Xarici işlər naziri Hakan Fidan bu təşəbbüsü Pezeşkiyan və xarici işlər naziri Seyid Abbas Arakçiyə çatdırıblar. Lakin mənbələrə əsasən, İranlılar Xameneinin razılığını almağa çalışsalar da, sui-qəsd təhlükəsi səbəbindən gizlənən Hamaneyi ilə əlaqə qurmaq mümkün olmayıb. Nəticədə iranlılar Türkiyə rəsmilərinə Xameneinin razılığının alınmadığını bildiriblər və danışıqlar təşəbbüsü rəsmi olaraq ləğv edilib.

Xatırladaq ki, İsrail Hərbi Hava Qüvvələri iyunun 13-də İran ərazisinə hava zərbələri endiriblər. Zərbələr nəticəsində çoxlu sayda yüksək səviyyəli hərbçi, o cümlədən İran Silahlı Qüvvələri Baş Qərargah rəisi Məhəmməd Baqeri, İran İslam İnqilabı Keşikçilər Korpusu (SEPAH) baş komandanı Hüseyn Salami, Xatəm Əl-Ənbiya Qərargahının komandanı Qulaməli Rəşid, 6 nüvə alimi və yüksək vəzifəli şəxslər ölüb. İran BMT Təhlükəsizlik Şurasının hadisə ilə əlaqədar fövqəladə iclas keçirməsini istəyib.

Bu hücumlara cavab olaraq isə İran Ordusu İsrailə qarşı "Həqiqi vəd III" adlı əməliyyat keçirib. Təl-Əviv, Qüds və digər bölgələrə yüzlərlə ballistik raket buraxılıb.