BAKI, AzerVoice

Türkiyənin milli təyyarə layihələri – HÜRKUŞ, HÜRJET və KAAN – radar, avionika və ağıllı sursatlarla təchiz olunaraq öz siniflərində ən qabaqcıl platformalara çevrilib.

AzerVoice xəbər verir ki, Ankarada keçirilən NATO Çox Sahə Əməliyyatları (MDO) Konfransı 2025-də çıxış edən Müdafiə Sənayesi Başqanı (SSB) Haluk Görgün müasir döyüş mühitində quru, hava, dəniz, kiber və kosmosun bir-biri ilə tam inteqrasiya olunmuş sahələrə çevrildiyini vurğulayıb.

Görgün qeyd edib ki, hazırda SSB tərəfindən 1100-dən çox aktiv satınalma və elmi-tədqiqat proqramı icra edilir ki, bu da Türkiyəni dünyanın ən böyük müdafiə layihəsi idarəedici strukturlarından birinə çevirir.

Türkiyənin pilotsuz uçuş aparatları sahəsində qlobal liderliyinə toxunan Görgün, Bayraktar TB2, AKINCI, ANKA və AKSUNGUR-un real vaxt rejimində kəşfiyyat və dəqiq zərbə imkanlarını sübut etdiyini, yaxın vaxtlarda isə QIZILELMA və ANKA-3-ün istifadəyə veriləcəyini bildirib. Dənizkurdu təlimində iki TB3 İHA-nın gəmidən eyni anda buraxılıb hədəfi dəqiqliklə vurması isə “dünyada dönüş nöqtəsi” kimi dəyərləndirilib.

Görgün əlavə edib ki, HÜRKUŞ (əsas təlim təyyarəsi), HÜRJET (reaktiv təlim təyyarəsi) və KAAN (beşinci nəsil döyüş təyyarəsi) texnoloji baxımdan öz kateqoriyalarında müasirliyi ilə seçilir.

Haluk Görgün, 2024-cü ildə Türkiyənin müdafiə və aviasiya ixracatının 7 milyard dollara çatdığını, bunun 55,4 faizinin NATO ölkələri və Ukraynaya yönəldiyini qeyd edib. Bu göstəricinin Türkiyənin NATO çərçivəsində etibarlı tərəfdaş olduğunu sübut etdiyini deyən SSB rəhbəri, “sadiq müttəfiqlərə qarşı sanksiya tətbiq etməyin ittifaqın ruhuna uyğun gəlmədiyini” bildirib.

Görgün həmçinin süni intellekt, rəqəmsal transformasiya, bulud texnologiyaları və çevik mühəndislik kimi texnoloji sahələrin artıq konkret prioritetlərə çevrildiyini, bütün dizayn və istehsalat proseslərində ekoloji davamlılıq prinsipinin əsas götürüldüyünü diqqətə çatdırıb. O, Türk müdafiə sənayesinin orta yaşının 34 olduğunu vurğulayaraq, gələcək nəsillərə hörmət və davamlı inkişaf anlayışı ilə NATO standartlarına uyğun sistemlər qurmağa davam edəcəklərini bildirib.

Qeyd edək ki, konfrans NATO-nun gələcək əməliyyatlar üçün çoxsahəli yanaşmalarını müzakirə etdiyi ən önəmli platformalardan biri hesab olunur.