BAKI, AzerVoice
İyun ayının 5-də Azərbaycan Dövlət Pedaqoji Universitetinin Quba Filialında mühüm əməkdaşlıq hadisəsi baş tutdu – Quba 1 saylı Mediasiya Təşkilatı ilə Universitet arasında qarşılıqlı əməkdaşlığa dair memorandum imzalanıb.
AzerVoice xəbər verir ki, tədbiri giriş sözü ilə açan ADPU-nun Quba Filialının direktoru, professor Yusif Alıyev, bu tarixi günün əhəmiyyətinə xüsusi diqqət çəkərək qeyd etdi ki, Memorandum yalnız bu iki qurum arasında deyil, ümumilikdə cəmiyyət və vətəndaş cəmiyyəti institutları üçün geniş əməkdaşlıq imkanları yaradır. O, bu təşəbbüsün bölgədə hüquqi maarifləndirmənin genişləndirilməsi, münaqişələrin alternativ və sülh yolu ilə həlli mədəniyyətinin təşviqi baxımından olduqca faydalı və zəruri olduğunu vurğulayıb.
Professor Yusif Alıyev çıxışında, Quba kimi strateji əhəmiyyətli bir bölgədə belə bir xidmətin – mediasiya institutunun fəaliyyət göstərməsinin vətəndaşlara hüquqi əlçatanlıq baxımından mühüm töhfə verdiyini qeyd etdi. O, Mediasiya Şurasının İdarə Heyətinin sədri cənab Nadir Adilovun bu sahədəki xidmətlərini yüksək qiymətləndirərək, öz adından və rəhbərlik etdiyi ali təhsil müəssisəsi adından təşəkkürünü bildirib.
Daha sonra Quba 1 saylı Mediasiya Təşkilatının rəhbəri, hüquqşünas-medİator Hümmət Əliyev çıxış edərək, bu tarixi əməkdaşlığın əhəmiyyətindən söz açdı. O, iştirakçıları təbrik edərək rəhbərlik adından salamlarını çatdırdı və bu Memorandumun yalnız bir sənəd deyil, gələcək bir çox ortaq layihənin başlanğıcı olduğunu bildirdi. Hümmət Əliyev, tələbələr üçün təlim proqramları, mediasiya mövzusunda seminarlar və birgə təşəbbüslərlə gənclərin hüquqi biliklərinin artırılmasının hədəfləndiyini vurğulayıb.
Tədbirin sonunda Memorandum imzalanaraq hüquqi qüvvə qazandı. Bu sənəd çərçivəsində tərəflər arasında birgə maarifləndirici tədbirlərin təşkili, təcrübə mübadiləsi, tələbələr üçün praktik biliklərin artırılması və mediasiya proseslərinin təbliği sahəsində əməkdaşlığın genişləndirilməsi nəzərdə tutulub.
Quba 1 saylı Mediasiya Təşkilatı və ADPU-nun Quba Filialı arasında bu cür strateji əməkdaşlıq bölgədə hüquqi mədəniyyətin və insan hüquqlarının qorunmasına mühüm töhfə verəcək.
