BAKI,VOA,Yusif Şərifzadə
Dünyanın ən böyük səkkiz gəmiçilik assosiasiyası BMT-ni Hörmüz boğazından keçən gəmilər üçün rüsum tətbiqinə qarşı çıxmağa çağırıb. Bu çağırış İran və Oman arasında strateji su yolunun idarə olunması ilə bağlı razılaşmanın yaxınlaşdığına dair məlumatlar fonunda edilib.
VOA xəbər verir ki, gəmi sahibləri və operatorlarını təmsil edən təşkilatlar BMT-nin Baş katibi Antonio Quterreşə və Beynəlxalq Dəniz Təşkilatının (IMO) baş katibi Arsenio Dominqesə məktub ünvanlayıblar.
Məktubda qeyd olunub ki, Hörmüz boğazından keçid üçün məcburi rüsum və ya başqa ad altında xidmət haqqının tətbiqi beynəlxalq dənizçilik təcrübəsinə zidd olacaq.
Təşkilatlar bildiriblər ki, belə bir addım beynəlxalq hüquq normalarını poza və qlobal iqtisadiyyata mənfi təsir göstərə bilər.
Məktub bazar ertəsi BMT-yə göndərilsə də, ictimaiyyətə çərşənbə günü açıqlanıb.