BAKI,VOA,Yusif Şərifzadə

ABŞ prezidenti Donald Tramp İordaniyada Amerika hərbi obyektlərinə qarşı həyata keçirildiyi bildirilən hücumlardan sonra Vaşinqtonun sərt cavab verəcəyini bəyan edib. Bununla yanaşı, o, İranla diplomatik həll imkanlarının hələ də mövcud olduğunu bildirib.

VOA xəbər verir ki, Donald Tramp "Fox News"a açıqlamasında ABŞ hərbi obyektlərinə qarşı hücumlara cavab olaraq İranın "çox sərt zərbə alacağını" deyib. Onun sözlərinə görə, Vaşinqton bu hücumlara cavabsız qalmayacaq.

Bundan əvvəl ABŞ və Səudiyyə Ərəbistanı İraqda İranın dəstəklədiyi silahlı qruplaşmaların mövqelərinə birgə hava zərbələri endirib. ABŞ rəsmiləri əməliyyatın Səudiyyə Ərəbistanının enerji infrastrukturuna qarşı həyata keçirilən hücumlara cavab olduğunu bildiriblər.

Ağ Evdən verilən açıqlamalarda son saatlarda ritorikanın daha da sərtləşdiyi müşahidə olunsa da, administrasiyanın əsas strategiyasının dəyişmədiyi vurğulanır. Vaşinqtonun İran siyasətinin hərbi və iqtisadi təzyiq üzərində qurulduğu bildirilib.

Bununla yanaşı, Donald Tramp ABŞ ilə İran arasında diplomatik çıxış yolunun mümkün olduğunu qeyd edərək, tərəflərin razılaşmaya əvvəlkindən daha yaxın olduqlarını düşündüyünü bildirib.

İran tərəfi Trampın son açıqlamaları və Ağ Evin bəyanatları ilə bağlı hələlik rəsmi münasibət bildirməyib.