BAKI,VOA

Azərbaycanda ilk dəfə olaraq UCB-1 calaqaltısı üzərində kütləvi şəkildə püstə tinglərinin yetişdirilməsinə nail olunub. Bu barədə "İsfa" MMC-nin direktoru Samir Xeyirbəyov məlumat verib.

VOA xəbər verir ki, Samir Xeyirbəyovun sözlərinə görə, əldə olunan nəticə ölkədə müasir tingçilik və bağçılıq sahəsinin inkişafı baxımından mühüm əhəmiyyət daşıyır. O bildirib ki, şirkət yeni texnologiyaların tətbiqi və yüksək keyfiyyətli ting istehsalının genişləndirilməsi istiqamətində fəaliyyətini davam etdirir.

Şirkət rəhbəri qeyd edib ki, qarşıdakı illərdə mavigilə bağlarının sahəsinin artırılması əsas prioritetlərdən biridir. Bununla yanaşı, sertifikatlı meyvə tinglərinin istehsal həcminin milyonlarla ədədə çatdırılması planlaşdırılır.

Samir Xeyirbəyov əlavə edib ki, gələcək layihələr sırasında Azərbaycanda ilk dəfə liofilizasiya texnologiyası əsasında meyvə və tərəvəzlərin emalı müəssisəsinin yaradılması da yer alır. Bu texnologiya məhsulların qida dəyərini və keyfiyyətini qoruyaraq uzunmüddətli saxlanmasına imkan verir.

Bundan başqa, Qusar rayonunda müasir suvarma sistemləri bazasının yaradılması da şirkətin strateji inkişaf planına daxil edilib.