BAKI,VOA,Yusif Şərifzadə

Yaxın Şərqdə hərbi gərginliyin yenidən artması dünya enerji bazarlarında qiymətlərin yüksəlməsinə səbəb olub.

VOA xəbər verir ki, İsrail və İran arasında qarşılıqlı hava hücumlarının yeni mərhələsinin başlaması qlobal maliyyə bazarlarında narahatlığı artırıb. İnvestorların hadisələrə reaksiyası dünya birjalarında satış təzyiqini gücləndirib.

Bazar ertəsi səhər saatlarında Brent markalı neftin bir barelinin qiyməti 5 faizdən çox bahalaşaraq 97 ABŞ dollarını ötüb. Bununla belə, qiymət hələ də bir barel üçün 100 ABŞ dolları səviyyəsindən aşağı qalır.

Qeyd olunur ki, göstərici ABŞ, İsrail və İran arasında hərbi qarşıdurmanın daha da kəskinləşdiyi aprel ayında qeydə alınmış 120 ABŞ dollarlıq zirvə həddinə çatmayıb.

Son həftələrdə atəşkəsdən sonra sülh danışıqlarının başlanacağına dair gözləntilər neft bazarında qiymətlərin müəyyən qədər azalmasına səbəb olmuşdu. Lakin İsrailin Livanın paytaxtı Beyruta zərbələr endirməsi və İranın buna cavab olaraq İsrail istiqamətində raketlər buraxması münaqişənin həlli ilə bağlı ümidləri zəiflədib.

Mütəxəssislərin fikrincə, apreldə qüvvəyə minmiş atəşkəsdən sonra İranın İsrailə qarşı ilk hücumu hesab edilən bu hadisə bölgədə vəziyyətin yenidən gərginləşdiyini göstərir və enerji bazarlarında qeyri-müəyyənliyi artırır.