BAKI,VOA, Nailə Babazadə

Pakistan hökumət rəsmilərinin verdiyi məlumata görə, ölkənin Baş Qərargah rəisi mareşal Asım Munir ilə ABŞ Prezidenti Donald Tramp arasında telefon danışığı baş tutub.

VOA xəbər verir ki, İslamabadda ABŞ və İran nümayəndə heyətləri arasında planlaşdırılan ikinci raund müzakirələr ərəfəsində keçirilən bu görüşdə əsas müzakirə mövzusu Hörmüz boğazındakı vəziyyət olub.

Mareşal Munir söhbət zamanı ABŞ Prezidentinə Hörmüz boğazının dəniz blokadasında saxlanılmasının İran tərəfi ilə aparılan danışıqlarda ciddi maneə törətdiyini bildirib. O, blokadanın aradan qaldırılmasının diplomatik prosesin uğuru üçün vacib olduğunu vurğulayıb. Donald Trampın isə buna cavab olaraq Pakistanın təklifini nəzərə alacağını və bu məsələni nəzərdən keçirəcəyini ifadə etdiyi qeyd olunub.

Pakistan rəsmiləri Vaşinqtondan gələn və ABŞ-ın "öncü heyətini" daşıyan iki təyyarənin artıq İslamabada endiyini təsdiqləyiblər. Buna baxmayaraq, müzakirələrin gələcəyi hələ də sual altındadır. İranın rəsmi mətbuatı və Devrim Mühafizələri (SEPAH) bəyan edib ki, ABŞ donanmasının Hörmüz boğazındakı blokadası tamamilə qaldırılmayana qədər İran heyəti müzakirə masasına oturmayacaq. Tehran blokadanı mövcud atəşkəs rejiminin pozulması kimi qiymətləndirir.

Xatırladaq ki, aprelin 8-də qüvvəyə minən iki həftəlik müvəqqəti atəşkəs fonunda Pakistan hər iki tərəf arasında vasitəçilik səylərini davam etdirir. İran Prezidenti Məsud Pezeşkiyan da son açıqlamasında müharibənin heç kimin maraqlarına xidmət etmədiyini və gərginliyi azaltmaq üçün bütün diplomatik yollardan istifadə olunmasının tərəfdarı olduğunu bildirib. Hazırda dünya diplomatiyasının diqqəti İslamabadda keçirilməsi gözlənilən "İslamabad danışıqları 2.0" raunduna dikilib.