BAKI, VOA, Nailə Babazadə
Avropa İttifaqına (Aİ) üzv ölkələrin liderləri 19 mart tarixində Belçikanın paytaxtı Brüsseldə bir araya gələrək Yaxın Şərqdə artan gərginliyi, İrana qarşı hərbi hücumları və bu hadisələrin enerji qiymətləri ilə enerji təhlükəsizliyinə təsirini müzakirə edəcəklər.
VOA xəbər verir ki, Aİ Şurasının sədri Antonio Kostanın rəhbərlik edəcəyi sammitdə Avropa Komissiyasının rəhbəri Ursula fon der Lyayen və Aİ-nin xarici siyasət üzrə ali nümayəndəsi Kaja Kallas da iştirak edəcək.
Sammitin gündəliyi olduqca gərgindir. Liderlər əvvəlcə BMT-nin Baş katibi Antonio Quterreş ilə görüşərək Hörmüz boğazının açıq saxlanılmasının vacibliyini və beynəlxalq hüququn qorunması məsələlərini müzakirə edəcəklər. Ukrayna Prezidenti Volodimir Zelenski də video-konfrans vasitəsilə iclasa qoşularaq cəbhədəki son vəziyyət barədə məlumat verəcək. Qeyd edək ki, Macarıstanın "Drujba" neft kəmərinə edilən hücumlardan sonra Kiyevə veriləcək 90 milyard avroluq yeni krediti veto etməsi sammitin ən çətin müzakirə mövzularından biri olacaq.
Yaxın Şərq mövzusunda isə Aİ liderlərinin ABŞ və İsrailin İrana qarşı əməliyyatları ilə bağlı mövqelərini koordinasiya etməsi və gərginliyin azaldılması üçün çağırışlar etməsi gözlənilir. Liderlər eyni zamanda Livan hökumətinə dəstək mesajı verəcək, Qəzza və İordan çayının qərb sahilindəki vəziyyəti dəyərləndirəcəklər. Sammit çərçivəsində keçiriləcək "Avro Sammiti"ndə isə Avropa Mərkəzi Bankının rəhbəri Kristin Laqardın iştirakı ilə iqtisadi rəqabət qabiliyyəti, rəqəmsal avro və enerji transformasiyası kimi strateji məsələlər masaya yatırılacaq.