BAKI, VOA, Nailə Babazadə

İraqda fəaliyyət göstərən və İran tərəfindən dəstəklənən "Kətaib Hizbullah" qruplaşması öz döyüşçülərinə qonşu İranda baş verə biləcək "uzunmüddətli müharibə" ssenarisinə hazırlaşmağı tapşırıb.

VOA xəbər verir ki, cümə axşamı yayılan bəyanatda ABŞ-ın bölgədə hərbi yığınağını artırması və təhdidləri "təhlükəli eskalasiya" kimi qiymətləndirilib. Qruplaşma xəbərdarlıq edib ki, müharibə başlayacağı təqdirdə ABŞ tərəfi "hədsiz böyük itkilər" verəcək. Bəyanatda həmçinin bütün döyüşçülərin "tükəndirici müharibə" ssenarisinə uyğun hazır vəziyyətə gətirilməsinin zəruriliyi vurğulanıb.

Silahlı qruplaşmanın komandirlərindən biri AFP agentliyinə verdiyi müsahibədə İranın onların strateji maraqları üçün həyati əhəmiyyət kəsb etdiyini bildirib. O qeyd edib ki, İrana edilən hər hansı hücum qruplaşmanı birbaşa hədəfə alır. Xatırladaq ki, keçən il İsrail və İran arasında baş verən 12 günlük müharibə zamanı İraqdakı silahlı qruplar müdaxilə etməmişdi. Lakin komandir bu dəfə daha az təmkinli olacaqlarını, xüsusilə rejim dəyişikliyinə yönəlmiş zərbələr endirilərsə, İrana hərbi dəstək verəcəklərini bəyan edib.

Livanın "Hizbullah" hərəkatının rəsmisi də mövzu ilə bağlı mövqeyini açıqlayıb. O bildirib ki, Livan qruplaşması ABŞ-ın İrana yönəlmiş "məhdud" zərbələri zamanı hərbi müdaxilə etməyəcək. Lakin İranın ali rəhbəri Əli Xameneiyə qarşı hər hansı hücum "qırmızı xətt" hesab olunacaq və bu halda "Hizbullah" prosesə birbaşa qoşulacaq. Digər tərəfdən, ABŞ Prezidenti Donald Trampın İranla nüvə danışıqlarının uğursuz olacağı təqdirdə hərbi zərbə hədələrini dəstəkləmək üçün bölgəyə hərbi gəmilər və qırıcı təyyarələr göndərdiyi bildirilir..