BAKI, AzerVoice, Nailə Babazadə

Papa XIV Leo bazar günü ABŞ əməliyyatı nəticəsində Prezident Nikolas Maduronun devrilməsindən sonra Venesuelada xalqın rifahının üstün tutulmalı olduğunu bildirib və ölkənin suverenliyinin təmin edilməsinə çağırıb.

AzerVoice xəbər verir ki, Vatikanın Müqəddəs Pyotr meydanında keçirilən Angelus duasından sonra danışan Papa, “Əziz Venesuela xalqının rifahı bütün digər mülahizələrdən üstün olmalı, zorakılığın aradan qaldırılmasına, ədalət və sülh yollarına qədəm qoyulmasına və ölkənin suverenliyinin təmin edilməsinə yönəlməlidir”, - deyə vurğulayıb.

Qeyd edək ki, ABŞ Venesuelanın devrilmiş prezidenti Nikolas Maduronu şənbə günü Nyu-Yorkda həbs edərək həbsxanaya yerləşdirib. Vaşinqton eyni zamanda Venesuelada “keçid dövrünü idarə etmək” niyyətində olduğunu və ölkənin zəngin neft ehtiyatlarından istifadə edəcəyini açıqlayıb.

Çin Xarici İşlər Nazirliyi şənbə günü ayrıca bəyanatla ABŞ-nin Venesuelaya qarşı həyata keçirdiyi addımları və prezidentə qarşı görülən tədbirləri kəskin şəkildə pisləyib. Pekin bu prosesdən “son dərəcə sarsıldığını” bildirib və əməliyyata qəti şəkildə qarşı çıxdığını vurğulayıb.

Nazirlik açıqlamasında qeyd edib ki, ABŞ-nin açıq güc tətbiqi və hegemon xarakterli bu cür hərəkətləri beynəlxalq hüququ və Venesuelanın suverenliyini ciddi şəkildə pozur, Latın Amerikası və Karib hövzəsində sülh və təhlükəsizliyi təhdid edir.

Çin ABŞ-ni beynəlxalq hüquqa və BMT Nizamnaməsinin prinsiplərinə əməl etməyə çağırıb, digər dövlətlərin suverenliyinin və təhlükəsizliyinin pozulmasına son qoymağa səsləyib.