BAKI,VOA,Yusif Şərifzadə

İyunun 24-də Venesuelada baş vermiş iki güclü zəlzələ nəticəsində həlak olanların sayı 4 333 nəfərə yüksəlib. Bu barədə ölkə Milli Assambleyasının sədri Xorxe Rodriqes məlumat verib.

VOA xəbər verir ki, Xorxe Rodriqes zəlzələlər nəticəsində 16 740 nəfərin müxtəlif dərəcəli xəsarətlər aldığını bildirib. Onun sözlərinə görə, həyatını itirənlərdən 315 nəfərin şəxsiyyəti hələ də müəyyənləşdirilməyib.

Milli Assambleyanın sədri bildirib ki, gələn həftədən etibarən zərərçəkən ailələrə yeni mənzillərin verilməsinə başlanılacaq. Onun sözlərinə görə, ölkə Prezidenti vəzifəsini icra edən Delsi Rodriqes ilk mərhələdə 200 mənzilin sahiblərinə təqdim olunmasını təmin edəcək.

Rəsmi məlumata əsasən, zəlzələlər nəticəsində 856 bina zədələnib. Onlardan 190-ı tamamilə dağılıb və ya daşıyıcı konstruksiyaları çöküb. Hökumətin ilkin hesablamalarına görə, zərərçəkənlərin yerləşdirilməsi üçün təxminən 25 min yeni mənzilə ehtiyac var.

Xorxe Rodriqes qeyd edib ki, Osma və Çuspa yaşayış məntəqələrində ümumi sahəsi 584 min kvadratmetr olan 40-a yaxın torpaq sahəsi yeni yaşayış layihələri üçün müəyyənləşdirilib. O əlavə edib ki, axtarış-xilasetmə əməliyyatları davam edir və xilasedicilər hələ də sağ qalanların tapılması ümidi ilə fəaliyyətlərini dayandırmayıblar.