Bakı, AzerVoice, Nailə Babazadə

İranın xarici işlər naziri Abbas Əraqçi ilə Səudiyyə Ərəbistanı Krallığının xarici işlər naziri şahzadə Feysəl bin Fərhan arasında telefon danışığı baş tutub.

AzerVoice xəbər verir ki, danışıq zamanı tərəflər İran və Səudiyyə Ərəbistanı arasında ikitərəfli münasibətlərin inkişafını, həmçinin regionda və beynəlxalq aləmdə baş verən əsas prosesləri müzakirə ediblər. Nazirlər siyasi məsləhətləşmələrin davam etdirilməsinin və qarşılıqlı əməkdaşlığın gücləndirilməsinin ortaq maraqlara və regional sabitliyə töhfə verəcəyini vurğulayıblar.

Yəmənin cənubundakı vəziyyətə toxunan Abbas Əraqçi ölkənin birliyinin və ərazi bütövlüyünün qorunmasının vacibliyini qeyd edib, uzunmüddətli sülhün təmin olunması üçün siyasi yol xəritəsinin həyata keçirilməsinin əhəmiyyətini vurğulayıb.

İran XİN rəhbəri, həmçinin İsrailin Livana qarşı hücumlarını pisləyərək, beynəlxalq ictimaiyyəti, xüsusilə atəşkəsə zəmanət verən tərəfləri bu hərəkətlərin qarşısını almağa və Livan xalqına qarşı pozuntuların davam etməsinə imkan verməməyə çağırıb.

Səudiyyə Ərəbistanının xarici işlər naziri isə region ölkələri arasında dialoq və əməkdaşlığın davam etdirilməsinin sülh və sabitliyin qorunması baxımından mühüm rol oynadığını bildirib. O, eyni zamanda İsrailin hərəkətlərinə görə məsuliyyətə cəlb edilməsinin vacibliyini vurğulayıb və regional əməkdaşlığın gərginliyin azaldılmasında əsas vasitə olduğunu qeyd edib.

Telefon danışığı iki ölkə arasında regional təhlükəsizlik və sabitliyin möhkəmləndirilməsinə yönəlmiş davamlı məsləhətləşmələr çərçivəsində keçirilib.