BAKI, AzerVoice, Nailə Babazadə

Birləşmiş Millətlər Təşkilatı (BMT) Sudanın Darfur bölgəsinin ən böyük şəhəri Faşirin Sürətli Dəstək Qüvvələri (RSF) tərəfindən ələ keçirilməsindən sonra qadınlar və uşaqlar da daxil olmaqla mülki şəxslərə qarşı zorakılığın davam etdiyi barədə xəbərdarlıq edib.

AzerVoice xəbər verir ki, BMT Baş Katibinin sözçü müavini Farhan Haq gündəlik mətbuat konfransında Sudandakı vəziyyəti şərh edib. O bildirib ki, Faşir şəhərində və ətrafında qadınlar, uşaqlar və digər dinc sakinlər hələ də zorakılığa məruz qalır.

Haq şəhərdə edamlar və cinsi zorakılıq barədə məlumatların daxil olduğunu, vətəndaşların şəhərdən çıxa bilmədiyini və xarici dünya ilə əlaqə qura bilmədiklərini bildirib. Onun sözlərinə görə, Faşirdə humanitar yardım işçiləri də daxil olmaqla yüzlərlə sivil həyatını itirib.

BMT rəsmisi həmçinin RSF tərəfindən humanitar yardımların çatdırılmasının əngəlləndiyini qeyd edərək, bu vəziyyətin “qəbuledilməz” olduğunu vurğulayıb və şəhərdə qalan insanlara yardımların dərhal və maneəsiz çatdırılması çağırışı edib.

26 oktyabr tarixindən bəri təxminən 71 min nəfərin Faşir və ətrafından qaçdığı bildirilib. Haq əlavə edib ki, bu şəxslərin çoxu qətl, qaçırma və cinsi zorakılığa məruz qalıb.

Haq, Sudan üçün hazırlanmış 2025-ci il humanitar yardım planının yalnız 28%-nin maliyyələşdirildiyini, planlaşdırılan 4,16 milyard dolların yalnız 1,17 milyard dollarının təmin olunduğunu qeyd edib.

Qeyd edək ki, Sudan 15 aprel 2023-cü ildən bəri ordu ilə xarici dəstəkli RSF arasında şiddətli döyüşlərə səhnə olur. Ölkənin qərbində yerləşən Darfur bölgəsinin ən böyük şəhəri Faşir, döyüşlərdən sonra böyük ölçüdə RSF-nin nəzarətinə keçib.

Şəhərdən qaçan on minlərlə insanın olduğu, SDQ-nın sivilləri zorla yerindən çıxardığı və çox sayda silahsız şəxsi öldürüb işgəncə verdiyi anlar SDQ üzvlərinin yayımladığı videolarda əks olunub.