BAKI,VOA,Yusif Şərifzadə

Kanadanın ShaMaran Petroleum şirkəti İraqın şimalında yerləşən Atruş və Sərsanq neft yataqlarında hasilat və ixrac əməliyyatlarını müvəqqəti dayandırdığını açıqlayıb. Qərarın səbəbi bölgədə təhlükəsizlik vəziyyətinin pisləşməsi ilə izah olunur.

VOA xəbər verir ki, ShaMaran Petroleum şirkətinin yaydığı açıqlamada Atruş və Sərsanq yataqlarında neft hasilatı və boru kəməri vasitəsilə ixracın “regional təhlükəsizlik mühitinin pisləşməsi səbəbindən” müvəqqəti dayandırıldığı bildirilib.

Şirkət birgə tərəfdaşları ilə birlikdə bölgədəki vəziyyəti diqqətlə izlədiyini açıqlayıb. Məqsədin yataqlarda çalışan personalın və şirkət aktivlərinin təhlükəsizliyini təmin etmək olduğu qeyd olunub.

ShaMaran Petroleum bildirib ki, təhlükəsizlik şəraiti uyğun hesab edildikdən sonra hasilat və ixrac fəaliyyətləri yenidən bərpa ediləcək.

İraqın şimalındakı neft yataqları ölkənin enerji sektorunda mühüm əhəmiyyət daşıyır. Regionda artan gərginlik və təhlükəsizlik riskləri enerji şirkətlərinin fəaliyyətinə təsir göstərir.