BAKI, AzerVoice, Nailə Babazadə

Birləşmiş Millətlər Təşkilatının Yaxın Şərqdəki Fələstinli Qaçqınlara Yardım və İnkişaf Agentliyi (UNRWA) bildirib ki, İsrailin uzunmüddətli hücumları nəticəsində Qəzza zolağı 61 milyon ton dağıntı ilə örtülüb.

AzerVoice xəbər verir ki, qurumun ABŞ mərkəzli X sosial media platformasındakı paylaşımında, İsrailin iki il ərzində Qəzza zolağını mühasirədə saxlayaraq bombaladığı və bölgənin geniş hissələrinin yerlə-yeksan edildiyi vurğulanıb.

UNRWA paylaşımda Qəzzadaki dağıntıları əks etdirən videoya da yer verərək bildirib ki, bəzi məhəllələr tamamilə məhv olub, fələstinli ailələr isə hələ də dağılmış binalar arasında sığınacaq və içməli su tapmağa çalışır.

Qurum, İsrailin humanitar yardımlara qoyduğu məhdudiyyətlərə baxmayaraq, UNRWA komandalarının həyati əhəmiyyət daşıyan yardımları çatdırmağa çalışdığını və çətin şəraitə baxmayaraq fəaliyyətlərin davam edəcəyini qeyd edib.

Məlumata görə, İsrailin 8 oktyabr 2023-cü ildə başladığı hücumlar nəticəsində 68 min 234 fələstinli həyatını itirib, 170 min 373 nəfər isə yaralanıb. Qəzzada hələ də minlərlə insanın dağıntılar altında olduğu bildirilir.

Qeyd edək ki, ABŞ Prezidenti Donald Tramp 9 oktyabrda Misirdə aparılan danışıqlar nəticəsində İsrail və HƏMAS-ın atəşkəs planının ilk mərhələsini təsdiqlədiyini açıqlamışdı.

Saziş 10 oktyabrda İsrail hökumətinin təsdiqi ilə qüvvəyə minib. İsrail ordusunun razılaşma üzrə “Sarı Xətt”ə çəkilməsindən sonra atəşkəs eyni gün yerli vaxtla saat 12:00-da qüvvəyə minib.

Bununla belə, İsrail ordusu razılaşmaya baxmayaraq ara-sıra müxtəlif bəhanələrlə Qəzzadaki fələstinlilərə qarşı hücumlarını davam etdirir.