BAKI, AzerVoice, Nailə Babazadə

Əfqanıstanın şərqində yerləşən Kunar vilayətində ötən həftəsonu baş verən 6 bal gücündə zəlzələdən sonra, bu dəfə Celalabad şəhərində 5,2 bal gücündə yeni yeraltı təkan qeydə alınıb.

AzerVoice xəbər verir ki, ABŞ Geoloji Araşdırmalar Mərkəzinin (USGS) məlumatına görə, yerli vaxtla saat 15:29-da Celalabad şəhərinin 34 kilometr şimal-şərqində 5,2 maqnitudalı zəlzələ baş verib. Zəlzələnin 10 kilometr dərinlikdə meydana gəldiyi bildirilib.

Zəlzələ ilə bağlı Celalabad və ətraf ərazilərdə ölən və yaralananlarla bağlı yerli hakimiyyətin məlumat verməsi gözlənilir.

ABŞ Geoloji Araşdırmalar Mərkəzi bazar günü bildirmişdi ki, Pakistan sərhədi yaxınlığında yerləşən Celalabad şəhərinin 27 kilometr şimal-şərqində, 8 kilometr dərinlikdə 6 bal gücündə zəlzələ baş verib.

Əfqanıstanın müvəqqəti hökumətinin sözçüsü Zəbihullah Mücahid həmin zəlzələdə min 411 nəfərin həyatını itirdiyini, 3 min 124 nəfərin isə yaralandığını açıqlayıb.

Yerli rəsmilər bunun son illərdə ölkəni sarsıdan ən güclü zəlzələlərdən biri olduğunu bildiriblər.

Afqanıstan Qızıl Aypara Cəmiyyəti ölkənin şərqində yerləşən 3 vilayətdə 8 mindən çox evin dağıldığını, çoxsaylı insanların dağıntılar altında qaldığını və xilasetmə işlərinin davam etdiyini açıqlayıb.

BMT-nin Humanitar İşlər üzrə Koordinasiya Ofisi (OCHA) bu dağıdıcı zəlzələdən ilk olaraq 12 min nəfərin birbaşa təsirləndiyini bildirib.