BAKI,VOA,Yusif Şərifzadə

İran Xarici İşlər Nazirliyi ölkənin cənubunda toy mərasiminin keçirildiyi yaşayış binasına ABŞ tərəfindən zərbə endirildiyini bildirərək hadisəni “müharibə cinayəti” adlandırıb. İran tərəfinin məlumatına görə, hücum nəticəsində azı dörd nəfər həlak olub, 50-dən çox insan yaralanıb.

VOA xəbər verir ki, İran Xarici İşlər Nazirliyinin sözçüsü İsmayıl Bəqayi bildirib ki, hadisə Sirik bölgəsində baş verib. O, toy mərasiminin keçirildiyi yerin bombalanmasını ABŞ-nin apardığı müharibənin mahiyyətini göstərən hadisə kimi qiymətləndirib.

İran Qızıl Aypara Cəmiyyətinin məlumatına görə, hava zərbəsi nəticəsində ölənlər arasında bir uşaq da var. Yaralıların sayının 50-dən çox olduğu bildirilir.

İran hökumətinə məxsus sosial şəbəkə hesabında yayımlanan görüntülərdə hücumdan sonra toy mərasiminin keçirildiyi bildirilən ərazidə dağıntılar əks olunub. Görüntülərdə insanların fəryad səslərinin eşidildiyi bildirilir.

Gəlinin atası Əli Mallahi İran dövlət televiziyasına açıqlamasında zərbənin yaşayış binasına dəydiyini və hadisənin qızının toy mərasimi zamanı baş verdiyini söyləyib. O, hadisəni son dərəcə kədərli adlandıraraq itkilərin daha çox olmamasına görə şükür etdiyini bildirib.

ABŞ Mərkəzi Komandanlığının sözçüsü Tim Hokins isə İran tərəfinin ittihamlarına cavab olaraq ABŞ ordusunun mülki şəxsləri heç vaxt qəsdən hədəfə almadığını bildirib. O, bununla bağlı İran İslam İnqilabı Keşikçiləri Korpusunu ittiham edib.

İran Xarici İşlər Nazirliyi hadisəni beynəlxalq hüququn pozulması və “müharibə cinayəti” kimi qiymətləndirir. ABŞ tərəfi isə mülki şəxslərin məqsədli şəkildə hədəfə alınması ilə bağlı ittihamları rədd edir.