BAKI,VOA,Yusif Şərifzadə

ABŞ Prezidenti Donald Tramp Hörmüz boğazından keçən gəmilərdən ödəniş alınması ideyasını bəyənmədiyini açıqlayıb. O bildirib ki, heç bir ölkə bu strateji su yolundan istifadə üçün haqq tələb etməməlidir.

VOA xəbər verir ki, Donald Tramp Ağ Evdə İraqın Baş naziri Əli əl-Zeydi ilə keçirdiyi mətbuat konfransında Hörmüz boğazından keçidlə bağlı açıqlamalar verib.

Tramp bildirib ki, heç kəs beynəlxalq gəmiçiliyin həyata keçirildiyi Hörmüz boğazından keçid üçün ödəniş tələb edə bilməməlidir.

ABŞ Prezidenti daha əvvəl gəmilərin boğazdan keçidi üçün 20 faizlik rüsum tətbiq ediləcəyini açıqlamışdı.

Lakin Tramp jurnalistlərə bildirib ki, bundan sonra Körfəz ölkələri ilə danışıb və həmin ölkələr belə bir yanaşma əvəzinə ABŞ-a milyardlarla dollarlıq investisiya yatırmağa üstünlük verdiklərini bildiriblər.

“Onlar dedilər: Biz bunu başqa yolla etmək istərdik. ABŞ-a milyardlarla və milyardlarla dollar sərmayə qoymaq istəyirik”, - deyə Tramp bildirib.

Hörmüz boğazı ilə bağlı açıqlamalar ABŞ-İran qarşıdurması və qlobal enerji daşımalarının təhlükəsizliyi fonunda diqqətlə izlənilir.