BAKI,VOA,Yusif Şərifzadə

ABŞ Prezidenti Donald Trampın Hörmüz boğazında blokadanın bərpa edilməsi və keçidlərə görə ödəniş alınması ilə bağlı açıqlamaları ekspertlər tərəfindən daha çox siyasi ritorika kimi qiymətləndirilib.

VOA xəbər verir ki, Körfəz Beynəlxalq Forumunun icraçı direktoru Daniya Təfər Donald Trampın son bəyanatlarını şərh edərək bildirib ki, bu açıqlamalar daha çox təzyiq vasitəsi xarakteri daşıya bilər.

Daniya Təfər qeyd edib ki, Trampın bəyanatlarının real addımlarla müşayiət olunub-olunmayacağı hələ aydın deyil. Onun sözlərinə görə, bu açıqlamalar ABŞ-ın İranla qarşılıqlı təzyiq siyasətinin bir hissəsi ola bilər.

Ekspert bildirib ki, İranın Körfəz ölkələrinə qarşı məhdudiyyətlər tətbiq etməsi və keçidlərə görə ödəniş tələb etmək niyyətinə cavab olaraq ABŞ da eyni addımları atmaq mesajı verir.

Daniya Təfər vurğulayıb ki, Trampın açıqlamaları beynəlxalq ictimaiyyət arasında narahatlıq yarada bilər. Onun sözlərinə görə, yalnız Körfəz ölkələri deyil, digər dövlətlər də Hörmüz boğazı məsələsinə həssas yanaşır.

Ekspert qeyd edib ki, Hörmüz boğazı beynəlxalq su yolu hesab olunur və əsas müzakirə mövzularından biri bu ərazidə heç bir ölkənin tam nəzarətə malik olmaması prinsipidir.

Hörmüz boğazı dünya enerji daşımalarının mühüm hissəsinin həyata keçirildiyi strateji marşrutlardan biridir. Burada hər hansı məhdudiyyət qlobal ticarət və enerji bazarlarına təsir göstərə bilər.