BAKI,VOA,Yusif Şərifzadə

ABŞ Prezidenti Donald Tramp bu həftəsonu Kemp-Devid iqamətgahına səfər edəcək. Bu, onun ötən il yenidən vəzifəyə qayıtdıqdan sonra Kemp-Devidə ikinci səfəri olacaq.

VOA xəbər verir ki, Ağ Ev rəsmisinin məlumatına görə, Donald Tramp səfər çərçivəsində siyasi və dövlət idarəçiliyi ilə bağlı bir sıra görüşlər keçirəcək. Prezidentin ailə üzvləri də həftəsonu səfərində onu müşayiət edəcəklər.

Səfər ABŞ ilə İran arasında yekun razılaşmanın əldə olunmasına yönəlmiş diplomatik səylərin davam etdiyi bir dövrə təsadüf edir. Cümə günü İsveçrədə keçirilməsi planlaşdırılan ABŞ-İran danışıqları isə təxirə salınıb.

Məlumata görə, Livanda atəşkəs xəbərlərinə baxmayaraq döyüşlərin yenidən alovlanması danışıqların vaxtı ilə bağlı qeyri-müəyyənliyi artırıb. Bu danışıqların əsas məqsədlərindən biri Hörmüz boğazının beynəlxalq gəmiçilik üçün tam açılması və bölgədə sabitliyin təmin edilməsidir.

Donald Tramp sonuncu dəfə 2025-ci ilin iyun ayında Kemp-Devidə səfər edib. Həmin vaxt o, yüksək rütbəli hərbi rəhbərlər və xarici siyasət üzrə müşavirlərlə Kaliforniyadakı etirazlar, İran və Qəzza zolağındakı vəziyyətlə bağlı müzakirələr aparmışdı.