BAKI,VOA,Yusif Şərifzadə

Qətər rəsmisi Hörmüz boğazından keçən gəmilər üçün daimi rüsumların tətbiqinin qlobal iqtisadiyyata mənfi təsir göstərə biləcəyi barədə xəbərdarlıq edib.

VOA xəbər verir ki, Qətər rəsmisi Şeyx Səud bin Əbdürrəhman Al Sani Sinqapurda keçirilən Şanqri-La Dialoqu təhlükəsizlik forumunda çıxışı zamanı Hörmüz boğazında mümkün rüsum siyasəti ilə bağlı mövqeyini açıqlayıb.

O bildirib ki, Qətər və digər Körfəz ölkələri gəmilərdən daimi keçid haqqı alınması ideyasını dəstəkləmir.

Rəsminin sözlərinə görə, belə rüsumlar nəticə etibarilə enerji, logistika və daşınma xərclərini artıracaq, bunun yükü isə son istehlakçıların üzərinə düşəcək.

Şeyx Səud bin Əbdürrəhman Al Sani vurğulayıb ki, Körfəz ölkələri beynəlxalq ticarətin və enerji nəqliyyatının maneəsiz şəkildə davam etməsində maraqlıdır.

Bununla yanaşı, o qeyd edib ki, mina təmizləmə, dəniz təhlükəsizliyi və fövqəladə tədbirlərin maliyyələşdirilməsi kimi konkret məqsədlər üçün müvəqqəti və hədəfli ödəniş mexanizmlərinin yaradılması müzakirə mövzusu ola bilər.

Açıqlama İran və Oman arasında Hörmüz boğazında gəmi hərəkətinin idarə olunması ilə bağlı müzakirələrin davam etdiyi bir vaxtda verilib.

Mütəxəssislər qeyd edirlər ki, dünya neft və mayeləşdirilmiş təbii qaz tədarükünün mühüm hissəsinin keçdiyi Hörmüz boğazında qəbul ediləcək istənilən yeni qərar beynəlxalq enerji bazarlarına və qlobal ticarətə birbaşa təsir göstərə bilər.