BAKI,VOA,Yusif Şərifzadə

Böyük Britaniyada İranla əlaqəli olduğu ehtimal edilən xarici kəşfiyyat fəaliyyəti ilə bağlı yeni cinayət işi açılıb. Hadisə ölkənin milli təhlükəsizlik qurumlarının diqqət mərkəzindədir.

VOA xəbər verir ki, Yunanıstan vətəndaşı İoannis Aidinidis Böyük Britaniyada İranla əlaqəli olduğu ehtimal edilən xarici kəşfiyyat xidmətinə yardım göstərməkdə ittiham olunub.

Böyük Britaniyanın terrorla mübarizə polisi bildirib ki, 46 yaşlı Aidinidis Almaniyanın Münhen şəhərində yaşayır və həftəsonu saxlanılıb. Ona qarşı ittiham ölkənin Milli Təhlükəsizlik Qanunu çərçivəsində irəli sürülüb.

Məlumata görə, Aidinidisin yaxın saatlarda Vestminster Magistrates Məhkəməsinə çıxarılması gözlənilir.

Polisin açıqlamasında qeyd olunub ki, ittihamlar Tehranın siyasətini tənqid edən və Londonda fəaliyyət göstərən Iran International televiziya kanalında çalışan jurnalistin hədəfə alınması ilə əlaqədardır.

Hüquq-mühafizə orqanları aparılan araşdırmaların davam etdiyini bildirərək, hazırda ictimaiyyət üçün daha geniş təhlükə qiymətləndirmədiklərini açıqlayıblar.

Hadisə son illərdə Böyük Britaniyada xarici dövlətlərlə əlaqəli olduğu iddia edilən təhlükəsizlik və kəşfiyyat araşdırmaları fonunda gündəmə gəlib.