BAKI,VOA,Yusif Şərifzadə

ABŞ Xəzinədarlıq naziri Skott Bessent Hörmüz boğazı ətrafında yaranan gərginlik fonunda Oman səfiri ilə danışdığını açıqlayıb.

VOA xəbər verir ki, Skott Bessent Prezident Donald Trampın Hörmüz boğazında sərbəst hərəkətin qorunması ilə bağlı sərt bəyanatlarından sonra Oman səfiri ilə əlaqə saxladığını bildirib.

Nazirin sözlərinə görə, Oman tərəfi boğazda hər hansı “rüsum sistemi” və ya əlavə ödəniş mexanizmi tətbiq etmək planının olmadığını Vaşinqtona təsdiqləyib.

Bessent qeyd edib ki, ABŞ administrasiyası Hörmüz boğazında sərbəst dəniz hərəkətinin qorunmasını strateji prioritet hesab edir.

O vurğulayıb ki, beynəlxalq enerji və ticarət marşrutlarının açıq qalması Vaşinqtonun bölgə siyasətində əsas xətt olaraq qalır.

Açıqlama son həftələr ABŞ və İran arasında Hörmüz boğazı ilə bağlı artan qarşılıqlı ittihamlar və təhlükəsizlik narahatlıqları fonunda verilib.

Analitiklər qeyd edirlər ki, Oman bölgədə ənənəvi vasitəçi rolunu qorumağa çalışır və Vaşinqton ilə Tehran arasında dolayı diplomatik təmaslarda mühüm aktorlardan biri hesab olunur.