BAKI,VOA, Fərid Mikayılov

ABŞ mediası İranın hücumlarının Yaxın Şərqdə yerləşən Amerika hərbi infrastrukturu üçün ciddi nəticələr doğurduğunu bildirir.

VOA xəbər verir ki, CNN telekanalının apardığı araşdırmaya əsasən, ABŞ ilə İran arasında artan gərginlik regiondakı Amerika hərbi bazalarına birbaşa təsir göstərib.

Məlumata görə, bəzi obyektlər ciddi əməliyyat zərbəsinə məruz qalıb, bir sıra hərbi infrastrukturlar isə tam yararsız vəziyyətə düşüb. Hücumların əsasən region üzrə yerləşdirilmiş müasir radar sistemlərinə, rabitə şəbəkələrinə, raketdən müdafiə vasitələrinə və hərbi aviasiyaya yönəldiyi bildirilir.

Zərər görən obyektlər sırasında İordaniyada yerləşən ABŞ-a məxsus THAAD raket batareyalarına bağlı radar sistemləri, eləcə də Birləşmiş Ərəb Əmirliklərində bəzi hərbi obyektlərdəki radar infrastrukturu qeyd olunur.

Eyni zamanda, Səudiyyə Ərəbistanında yerləşən hava bazasına edilən hücum zamanı ABŞ-a məxsus “Boinq E-3 Sentry” erkən xəbərdarlıq təyyarəsinin məhv edildiyi də vurğulanır.

Pentaqon rəsmiləri ötən həftə Konqresdə çıxış edərək ABŞ-ın İrana qarşı əməliyyatlarının təxminən 25 milyard dollar dəyərində olduğunu açıqlasa da, CNN və CBS News kimi bir sıra Amerika media qurumları ümumi xərclərin ən azı 50 milyard dollara çatdığını iddia edir.