BAKI,VOA, Fərid Mikayılov

ABŞ-ın “Washington Post” nəşri iddia edir ki, Macarıstan rəhbərliyi uzun illər ərzində Avropa İttifaqı Şurasının iclaslarında müzakirə olunan məxfi məlumatları Rusiyaya ötürüb.

VOA xəbər verir ki, qəzetin adının açıqlanmasını istəməyən Avropa təhlükəsizlik rəsmisinə istinadən yaydığı məlumata görə, Budapeşt Aİ liderlərinin qapalı müzakirələrində səslənən fikirləri mütəmadi olaraq Moskvaya çatdırıb.

İddialara əsasən, Macarıstanın xarici işlər naziri Peter Siyarto Aİ toplantılarının fasilələri zamanı Rusiya xarici işlər naziri Sergey Lavrovla əlaqə saxlayaraq danışıqların kulis detalları barədə məlumat verib və hətta tövsiyələr irəli sürüb.

Mənbənin sözlərinə görə, “Aİ çərçivəsində keçirilən hər bir toplantı sanki Moskvanın da iştirak etdiyi iclasa çevrilib”.

Məsələ ilə bağlı Polşanın baş naziri Donald Tusk da münasibət bildirərək bildirib ki, bu cür iddialar onlar üçün gözlənilməz deyil və bu istiqamətdə əvvəldən şübhələr mövcud olub.

Macarıstan Xarici İşlər Nazirliyi isə ittihamları qətiyyətlə rədd edib. Nazir Peter Siyarto sosial media hesabında bu məlumatları “saxta xəbər” adlandıraraq, onların qarşıdan gələn parlament seçkiləri ərəfəsində müxalif TISZA Partiyasına dəstək məqsədi daşıdığını iddia edib.

Məsələ ilə bağlı Polşanın xarici işlər naziri Radoslav Sikorski də açıqlama verərək iddiaların “bir çox məqamı izah etdiyini” qeyd edib.

Qeyd edək ki, Macarıstanda parlament seçkiləri 12 aprel tarixində keçiriləcək.